建行（亞洲）香港美酒佳餚巡禮2017

香港美酒佳餚巡禮係每年一度嘅盛事，我都唔記得去咗幾屆，總之西九、啟德同中環三地都去過晒，論到地方就一定係中環方便同闊落嫁喇，不過迫人買飛呢樣就唔好囉，如果好似西九果陣咁，免入場費而又自己帶杯，可以係場內買品酒券，其實可以慳返更多人力物力，而且減少咗好多混亂情況，連排隊都畀人搞到排錯隊…Anyway，今年我抽到免費品酒證，慳返兩舊水。





入場分開現場購票同已購票，呢個係幾好，但已購票果度又分三條隊即刻混亂到七彩



今年係金鐘方向入場，估計應該比中環方向少人，不過入場位係zone c就唔係我嘅焦點所在，呢支sanrio招紙嘅酒我係唔會買嘅…



荔枝酒似乎唔錯，但啱啱入場當然係睇定啲



呢啲我就有興趣喇﹗築地山貴水產本身都有餐廳喺灣仔，但出嚟擺檔又另一番風味啦，同埋你唔好意思入餐廳叫得少少嘢食，但擺檔口無所謂嘛



呢個亦都相當吸引﹗平時淨係兩塊扒可能都要$300了，仲賣埋大蝦畀你添，唔知之後幾日有咩優惠呢？

返咗香港就好耐無飲過生啤，香港太貴喇﹗既然一場嚟到就飲少少啦。

呢個little creatures brewing隻天使都幾抵死，啤酒聞落去有啲蜂蜜嘅氣息，甜而不苦，都唔錯

賣熟食嘅攤檔永遠都係排長龍

但有啲太普通嘅習慣掠過，又係芝士…

星河酒都出現咗最少三年，呢啲睇落靚嘅客源應該都係女性居多，咁就九成都係甜嘅

對我嚟講如果要飲甜酒，不如飲冰酒，德國冰酒世界知名啦

呢一檔一張酒券可以試晒四支冰酒，好抵玩，我就鍾意右二帶紅色果支，香而唔太甜，最左果支個人認為最無個人風格

跟住就畀呢支俄羅斯總統御用酒吸引著，可惜無得試飲，咁就轉向其他酒啦



希臘嘅紅酒係第一次飲，雖然話大家傾向鍾情法國紅酒，但講紅酒歷史照計希臘嘅歷史比較長，古希臘文明仲早過古羅馬文明喎！攤檔嘅大姐話呢支酒仲係用眾神之山奧林帕斯山種植嘅葡萄，用緊公元前嘅方法採摘釀造，呢支酒亦係用嚟供奉畀眾神，信住先啦。
支Rapasani Grand Reserve係2005年嘅，都十歲仔應該㗳得下，大姐話希臘酒嘅丹寧比較重，對比法國酒陳二三十年係高峰，希臘酒陳四五十年先係高峰。嗯⋯我飲落的確係時間未夠，不過佢苦澀味都走得七七八八好易入口，大姐話支酒隔過夜等佢醒夠酒先係最精彩，真係要買返去先知喇。

清酒而家就越嚟越盛行，十年前讀書就諗過用清酒嚟做project，都話有發展潛力啦。

美酒佳餚節最抵嘅地方我覺得係佢搵專家嚟講解紅酒知識，少少入場費聽完可以扮下專家呃蝦條，唔使專登上堂喎（喂

到咗波爾多村，睇係有無啱心水啦！
 

飲紅酒，自然唔會少咗法國波爾多份，係咁易走咗轉，好似無咩老酒，呢支04年，照殺。

根據維基講，Chateau la tour haut brion係premier grand cru, 同級嘅酒莊包括拉菲同瑪歌，唔識嘢都揀到間靚莊，好運。

呢支酒酒色就唔算好深，聞一下⋯medium body啦搖佢亦無咩掛杯，飲落係dry得嚟帶啲莓類味道，丹寧味就已經褪晒，之但係即使佢孤寒到畀得果半啖，都覺得支酒仍然未到時候開。

最後當然唔少得另一醉愛威士忌啦，雖然話係蘇格蘭生活過，但唔可能飲得晒咁多支蘇威嘅，尤其係高價蘇威真係自己隊咩？呢支27年嘅蘇威，同自己差唔多年紀，絕對試得過啦。
The Whisky Agency Glen Moray 27 Year Single Malt Whisky嚟自speyside區，雖然地區唔大但反而係蘇格蘭最多蒸餾廠嘅地方。一聞我就已經覺得唔錯，飲落果然又柔又順唔會搶，甚至仲帶啲甜添，睇佢招紙咁霸氣估佢唔到反而幾啱女仔飲，去wine and dine就係試呢啲唔捨得買先值嫁嘛。

今年搵唔到啱嘅心水酒，最主因都係因為試酒嘅份量實在太少，一支酒750ml，收三張酒券六十蚊，唔好話二十分一支，連20ml都未必有，都真係有啲過份。