酒品點評 - 麒麟本醸造濃熟オールド

好多酒都可以陳年，清酒亦唔例外，陳年過嘅清酒一般叫做古酒，一聽就知有歷史。



以前曾經飲過古酒，味道就相當強，同茅台相似我完全頂唔順。不過呢支係我試飲過ok先買。

雖然試飲果支係新酒而呢支係過咗一年，聽職員講啲味就turn down咗，但因此打咗八折我又無咩所謂。

先由室溫開始飲啦，會覺得佢似穀物味多過米味，雖然唔太準確但有啲啤酒嘅感覺，不過係無氣唔凍版，咁你知無氣又唔凍嘅鬼佬涼茶一啲都唔鬼佬，真係幾涼茶，少少酸又有啲甜，唔會係新手酒品囉。

一般情況暖嘅清酒會更烈，呢支古酒暖咗後氣味的確濃郁好多，不過飲落味道反而甜味突出啲少咗份酸，同紹酒有幾份接近，個after taste有少少似朱古力添！

試埋凍飲啦不如？飲落酒味最淡係凍飲唔使講，同室溫比亦都較甜，飲開清酒嘅未必一下子就接受到古酒，用凍飲嚟入門係好啲嘅。