舖頭門口有麵包櫃，有時仲會遇到新鮮出爐貨，唔知而家仲有幾多茶餐廳兼賣麵包呢？
入到去人頭湧湧生意好，唯獨是擔心無位坐，不過好在香港人出名能屈能伸，搭枱根本唔係問題。
餐廳歷史唔短，不過餐牌又幾乾淨。
睇清楚個餐牌仲係用緊七位數字嘅電話，logo係用舊時右到左嘅寫法。
餐牌表面無與時並進，不過價錢有。有啲款式你聽過但未食過，有啲無價錢嘅相信已經被時代淘汰無得再食。
麥兜裡面經典橋段，常餐=特餐=午餐=快餐=晚餐，其實真係改少少嘢咋。最後就揀咗特餐。
首先嘆返杯奶茶先啦，色澤就唔錯啦，入口茶味唔算太濃但唔澀口，質感亦都細滑而帶奶香，老字號啲奶茶通常都有返中上水準。
火腿奄列送到，加埋一個迷你餐包，餐包唔係自己做可忽略。奄列用嘅油都幾多，所以煎出嚟幾靚切開仲有蛋漿，火腿絲唔會凍冰冰，作為老字號呢啲基本功真係唔衰得。
沙嗲牛嘅牛肉大概五六塊，食落口有啲韌，不過咁都好最少無畀鬆肉粉乸到無咬口。沙嗲味同以前比就遜色咗，花生香唔夠濃，沙嗲汁都比較少，好在公仔麵唔會煮到爛晒，整體都叫尚可。
而家乜都加，所以佢價錢同喺度返工果陣比貴咗好正常，不過沙嗲牛嘅味道實在無以前咁濃味，可惜啊可惜。
價錢：$37
沒有留言:
張貼留言