英倫食記：愛丁堡 Field - 輕量米芝蓮午餐

英國雖然被稱為劣食王國，只要不吃英國菜都OK，其實在愛丁堡，米芝蓮推介都幾多，這間還有午市套餐，價錢亦平民，一於試試。



舖頭地方淺窄，幾乎拉椅子就會撞到後面，不過因為我一個人，位置正好對準門口，後面一道牆完全安心不怕無情肘。



午市時間較短，自然可以選擇菜式都較少。這午餐同時也是Pre Theatre餐，勉強可以當晚餐吧。



西餐有麵包應該係慣例，店方有將多士烘熱，稍稍能將牛油融化，鬼佬整西餐的確比香港講究。



Scottish egg係街頭見得多，但一隻炸蛋要三鎊以上絕不捨得，既然米芝蓮食府的starter中有得揀，如此花三四鎊倒是較心甘情願。雖然只得半隻，但街外蘇格蘭炸蛋一不知炸了多久，二不能做溏心（易有細菌），在此即點即做，米芝蓮加持，差價是要付的。

外層為black pudding，可以譯作黑血腸，成份跟香腸類同但加了血，口感並非廚師腸般爽口，而係綿軟甚至帶黏，鬼佬好鍾意這種口感…除此之外仲有燕麥在內，其實有點像蘇格蘭另一名物haggis，味道都幾惹味。溏心蛋做得很精美，雖然蛋味較淡，其溏心蕩漾也令人春心蕩漾。加上青蘋果片和蘋果酒蛋黃醬，帶點酸甜確實醒胃。

主菜是叫Pollock的魚，正式中文名不知道，肯定的是鱈魚一種。雖然係煎魚，但感覺竟似酒樓食飯時點的蒸魚，滑溜又清甜且不帶腥。多吃兩口，帶一點芹菜味的？！原來他們將一種叫根芹菜的植物，烤完再壓碎，和薯蓉做法相當接近。整個配搭頗為清淡，但又不會覺得食而無味，很適合辛勞過後的週末，來一個小清新。



雖然食物味道和賣相俱佳，但這個午市套餐份量沒有很多，即使對女士而言似乎也不太夠，對我來說就更不用說了。