將軍澳豪園小食 他們做雞是對的

厚德街市裝修過後，原本郵局的位置變成了美食廣場，果然喺領展呢啲吸血鬼下，呢個咁當眼嘅位置無可能畀公營機構蝕錢。新開嘅美食廣場畀我想像中大好多，以前做郵局果陣都唔覺有咁大，你話佢係僭建我都信，政府嘅嘢…郵局咁大當然要分拆上市以求賺到盡，最當眼果間舖就係呢間豪園小食，雖然畀財爺昆咗去搞美食車，但佢撐得住仲成功做到上舖頭，咁犀利梗係值得支持嘅。



呢度最出名嘅係食雞，咁梗係要叫雞，睇下係咪they do chicken right. 呢度算係專做外賣生意，始終九成客源都會係將軍澳街坊，好在都仲有幾個位畀我同朋友坐低吹水，男人嘢唔通返屋企講畀媽咪聽咩。

睇宣傳品好似幾受TVB歡迎，可能因為上過電視劇啦，雖然我已經無睇好耐。

呢度有slow cook嘅雞翼，一講起slow cook雞就諗起日本食過slow cook雞肉叉燒，的確係極品。Slow cook雞翼有個幸福住家雞味（$38），唔知食完係咪會開心好幸福。幸福住家雞即係蒜頭洋蔥口味，而其實我屋企從來無試過咁煮，可能我屋企唔夠住家啦。Anyway，啲雞翼夠大隻就加分嘅，真係唔知點解兩大美式連鎖店啲雞隻隻都營養不良咁怪雞，你知啦，保持低質其實比保持高質更難。隻雞食落去真係滑溜嘅，slow cook下雞肉係有啲帶紅，呢個唔係唔熟係因為slow cook本來係咁。蒜頭味幾濃郁，而洋蔥經過長時間烹調近乎融入醬汁中，我覺得呢隻雞再加啲花雕酒就正囉﹗


細嫩慢煮大雞翼

一間茶記到唔到家，一個係睇乾炒牛河，另一個一定係沙嗲牛肉，個汁真係間間都唔同，通常要舊茶記先好食。呢度嘅沙嗲牛肉包（$25）算係不過不失，牛肉唔會用鬆肉粉乸到無咬口，沙嗲味係有啲接近舊茶記但諗唔起差啲咩。


沙嗲牛肉算正常

一個包澱粉質有限，仲要兩個男人分，都係叫多兜撈麵先。撈麵就有三隻味，為咗驗證自己嘅味覺無錯，整多碗沙嗲撈麵（$10）先。沙嗲汁個色水就差唔多，而且唔會太稀，但花生香就比較弱，唔算出色但唔難食，真係估唔到暫時人生食過最正嘅沙嗲汁會喺荷蘭。個麵底就比較有趣，質感似大光麵但味道就有福麵嘅雞粉味，對此我表示中立。


個汁的確唔夠香

重頭戲開始，車打芝士雞翼（$25）梗係襯熱食先，有邪惡無流心有芝士無拉絲嘅炸雞翼，芝士份量夠大方味道都幾濃，雞翼就算得返一條骨，個Size都比兩大連鎖店大隻，仲要唔係粉多過肉，而且即使被芝士浸住，炸漿仍然夠香脆，真係唔到你唔服。


濃郁芝士夠邪惡

鹹蛋魚片嘅熱潮下，當然要叫個黃金雞翼（$28）應一應境。少咗啲芝士，可以見到吸油紙上其實無咩油份，真係唔知點解兩大連鎖店又油又唔脆…除咗鹹蛋黃外，個雞翼仲有啲蒜頭喺面，鹹香又惹味，最緊要係啲雞翼炸完仍然有肉汁，好過食果啲貴一貴嘅魚皮啦。


鹹香雞翼係抵食

食咁多炸嘢，無理由唔口渴，雖然令人最爽嘅係汽水，但佢哋嘅檸茶有啲特別，梗係叫返杯試下。佢哋嘅檸茶見唔到檸檬，因為一早已經打成蓉。雖然篤檸檬係幾好玩，但好多時會手賤篤到過酸。而呢杯檸茶BB（$10）茶味清而不澀外，甜度酸度都夾得幾好，仲可以飲到果肉我就幾鍾意喇。


粒粒果肉凍檸茶

雖然睇餐牌個價錢好似好貴，但諗真雞店啲雞水準咁差都三四十蚊一個餐，女僕炸雞店租畀你仲要四五十添，計落我哋嘅港產出品咪仲抵食夾大件，真係winner winner chicken dinner。

價錢：$150/2