匈牙利版出前一丁（麻油味）

Hungry⋯咳咳，Hungary版本出前一丁！雖然個包裝好鬼大陸，但點都要試試佢！用最基本嘅麻油味試味最啱，裏面包粉就好似細左薄身左，估計得港版嘅三分二甚至一半。根據鬼佬嘅性格一定會成包放晒，照港版份量肯定鹹死佢地。包麻油就一樣咁少，明明麻油先係精華。

我煮麵從來就唔跟個標準時間三分鐘，個麵餅散開晒就知差唔多食得，匈牙利版好似比較快就煮起，但對鬼佬來講可能已經算慢，嗰啲寫住一分鐘食得嘅即食麵廿秒就要熄火。

睇落個樣就無咩分別，之不過包粉啲蔥片少好多。我就習慣將粉倒落碗先加水，咁我會知食左幾多味精嘛。我都無放晒全包，三分二左右啦，但個湯已經幾鹹，應該放一半就啱口味。最重要嘅麻油就無咩唔同，都係到喉唔到肺。

麵質就有好大分別，明顯硬身啲較有咬口。我以為係煮麵時間短左關係，但浸耐左啲麵都無點發漲，呢點就贏港版唔少喇。